DÍA DO LIBRO: UN CONTO PARA LEMBRAR.

 O día do libro é unha das datas máis especiais para min… e sei que tamén para todo o cole! Por iso, este ano celebrámolo cunha das actividades favoritas do noso alumnado: os contos intercursos.

Que marabilla ver aos maiores contando historias aos máis pequenos! E despois, entre todos, crear un debuxo sobre o conto compartido. O cole enteiriño transformouse nun mar de narracións: contábanse contos na nosa gran Bibliopuíñas, polos corredores, no hall, na cova do PDI… ata preto do noso querido troncomóbil! 

E non me digades que non é incrible escoitar contos… tamén en inglés! Que artistas están feitos estes nenos e nenas. Todo isto fai que eu, Puíñas, soñe cun futuro onde, os nenos e nenas da miña biblio, leven consigo ese amor polos libros.

Por Puíñas, sempre entre contos 

CONTACONTOS NA GRADA

 Contos na grada

Na nosa escola a lectura é cousa de todos, e cada semana as mestras de Infantil acoden á nosa marabillosa grada para contarlle contos ao alumnado máis pequeno.

Un momento especial cheo de emoción, voces que encantan e historias que fan voar a imaxinación. Así, sementamos o amor polos libros dende ben pequeniños.

Puíñas, sempre atento no seu recuncho lector 

A XUNTA, INAUGURA A NOSA BIBLIOPUÍÑAS!

Quero compartir con todos vós esta publicación: 

UN DÍA PARA O RECORDO... CUN CORAZÓN CHEO DE EMOCIÓN!

Por Puíñas, o porco espiño da nosa Bibliopuíñas

Hoxe foi un día máxico… por fin chegou a tan agardada inauguración da nosa biblioteca! Unha desas xornadas que se gardan ben fondo na memoria. Tivemos a sorte de contar coa presenza da ANPA, do Consello Escolar, da bibliotecaria municipal, das autoridades… e mesmo coa visita especial da escritora Ana Meilán, que encheu a mañá de contos marabillosos . Un auténtico luxo!

Pero sabedes que é o que me encheu o fociño de orgullo? Ver ao meu alumnado, sempre disposto, sempre entregado. Presentaron os recunchos con ledicia, cantaron todos xuntos unha canción moi especial, e… chegou o momento do noso robot que descubriu a placa da inauguración!

O profesorado e o noso gran conserxe, emocionados, sabían que todo o esforzo valera a pena. Foi un día cheo de ilusión, traballo en equipo e emocións compartidas. 

Agora, toca seguir traballando, porque Bibliopuíñas é un soño feito realidade, un motor de aprendizaxes e alegría para toda a escola, é moito máis ca un espazo: é un proxecto vivo, colaborativo e cheo de ilusión.

ROBÓTICA EN BIBLIO CREATIVA (Contando os días para a inaguración…)

 Por Puíñas, corazón e plumas da nosa biblioteca

Xa falta moi pouco para unha das xornadas máis especiais de Bibliopuíñas… a gran inauguración!  Que ilusión e canto traballo hai detrás: cada estante, cada recuncho...

E mentres tanto… aquí, non se para un segundo, dende o espazo de biblioteca creativa: os nosos rapaces e rapazas do proxecto competencial e outros cursos andan a traballar arreo na creación dun robot moi especial, que promete sorprendernos o día da festa.

Vémonos moi pronto para celebralo todos xuntos!